Wunderschöni Kulisse geschtert Abig am Thunersee für es chlyses Konzert am Schloss Ralligen bi Merligen. Ha di Region (Berner Oberland) gar nöd e so richtig kennt. Irgendwie hani mi bis jetzt immer uf s´Seeland und d´Achse Biel-Bern konzentriert. D´Muetter vomenä Kolleg hät ihrä 50. Geburi gfieret. Ihrä Sohnema hät e chlyni musikalischi Truppe vo sinä Kollegä zämme gschtellt. Kännt hani die nettä Herrä noni so guet. Immerhin hani mit fascht allnä schonemal amenä UniBe-Gottesdienst Worship gmacht.
Gspillt hämmer an dem Abig so 60ies Sound (Ain´t No Sunshine, Stand By Me, House of the Rising Sun), es Mani Matter-Lied (Mir hät de Dings verzellt), wunderschön begleitet vo zwei coolä Sängerinä. Nachher häts au no es solo A-Gitarre-Schtück geh. Und susch eifach gjammt. Am Aafang isch es relativ schwierig xi ois irgendwie zfindä. D´Lieder sind guet glofa. So richtig gfägt häts aber ersch ganz am Endi. Irgendwie simmer i e Groove cho und händ fasch nummä chonnä uufhörä. Irgendwo so 15-20 Minute lang gspielt bi dem Schtück. Ich hätti gärn das Ganzi ufgno aber ich gloub es isch schöner de Momänt oifach als Errinerig s´bahlte.
Merci ar Daniela Meierhofer für die zwei schönä Bilder (2 und 3).

